وکٹ لینے پر حارث رؤف کا ’انڈونیشین بچے‘ والا منفرد جشن وائرل

ویسٹ انڈیز کے خلاف تیسرے ٹی ٹوئنٹی میچ میں جہاں پاکستانی ٹیم نے شاندار کارکردگی دکھائی، وہیں فاسٹ بولر حارث رؤف کا انڈونیشین بچے کے انداز میں وکٹ لینے کے بعد منایا گیا جشن سوشل میڈیا پر خوب وائرل ہو رہا ہے۔ طویل عرصے کی مایوسی اور تنقید کے بعد بالآخر پاکستانی شائقین کے چہروں پر خوشی لوٹ آئی، جب قومی ٹیم نے ویسٹ انڈیز کو تین میچوں کی ٹی ٹوئنٹی سیریز میں شکست دے دی۔ امریکی ریاست فلوریڈا کے شہر لاؤڈرہل میں کھیلے گئے فیصلہ کن میچ میں پاکستان نے ویسٹ انڈیز کو 13 رنز سے ہرایا اور سیریز 2-1 سے اپنے نام کر لی۔ پاکستان کے لیے یہ جیت اہم تھی، لیکن فاسٹ بولر حارث رؤف کی جانب سے وکٹ لینے کے بعد کیے گئے دلچسپ جشن نے سب کی توجہ حاصل کر لی۔ یہ واقعہ پانچویں اوور میں پیش آیا جب حارث رؤف نے ویسٹ انڈیز کے وکٹ کیپر جیول اینڈریو کو 24 رنز پر آؤٹ کیا، اینڈریو اپنی ٹیم کو مضبوط آغاز فراہم کر چکے تھے اور وکٹ گرنے کے بعد انہیں پویلین لوٹنا پڑا۔ وکٹ کی اہمیت کو سمجھتے ہوئے حارث رؤف نے سوشل میڈیا پر وائرل ’فارمنگ اورا‘ انداز میں جشن منایا، جس کی ویڈیو انٹرنیٹ پر وائرل ہورہی ہے۔ گزشتہ ماہ انڈونیشیا کے ایک بچے کی ویڈیو انٹرنیٹ پر وائرل ہوئی تھی، جس نے کشتی ریس کے دوران اپنی ٹیم کا حوصلہ بڑھانے کے لیے ایک منفرد ڈانس کیا تھا، جسے ’اورا فارمنگ‘ کا نام دیا گیا تھا۔ یہ ڈانس دنیا بھر میں بے حد مقبول ہوا اور کئی معروف شخصیات نے بھی اس ٹرینڈ کو اپنایا۔