عام انتخابات اپنے مقررہ وقت پر ہوں گے: چیف الیکشن کمشنر

چیف الیکشن کمشنر سکندرسلطان راجہ کا کہنا ہے کہ عام انتخابات کا وقت قریب ہے، سب نے مل کر منصفانہ اور شفاف الیکشن کو یقینی بنانا ہے۔ چیف الیکشن کمشنر سکندر سلطان راجہ اور نگران وزیراعلیٰ پنجاب محسن نقوی کی زیر صدارت اہم اجلاس ہوا، جس میں الیکشن کمیشن کے چاروں صوبوں کے ممبرز اور پنجاب کابینہ نے شرکت کی۔ اجلاس میں عام انتخابات کے انعقاد کیلئے انتظامات، پنجاب حکومت کی تیاریوں کا تفصیلی جائزہ لیا گیا اور عام انتخابات کا پُرامن اور منصفانہ انعقاد یقینی بنانے کے عزم کا اظہار کیا۔ اجلاس میں عام انتخابات کے لئے سیکیورٹی انتظامات پر بھی بریفنگ دی گئی ، نگران پنجاب حکومت الیکشن کمیشن سے کوآرڈینیشن کیلئے فوکل پرسن مقرر کرے گی۔ اجلاس میں ،چیف الیکشن کمشنر سکندرسلطان راجہ نے کہا کہ عام انتخابات مقررہ وقت پر ہوں گے، عام انتخابات کا وقت قریب ہے، سب نے مل کر منصفانہ اور شفاف الیکشن کو یقینی بنانا ہے۔ سکندرسلطان راجہ کا کہنا تھا کہ نگران پنجاب حکومت کو فری اینڈ فیئر الیکشن کیلئےمکمل سپورٹ کریں گے ، 30نومبر تک حلقہ بندیوں کا مرحلہ مکمل ہو جائے گا، الیکشن کمیشن شفاف، آزادانہ اور منصفانہ عام انتخابات کیلئے تیار ہے۔ اس موقع پر محسن نقوی نے کہا کہ عام انتخابات کے پُرامن اور شفاف انعقاد کے لئے ہر ممکن تعاون کیا جائے گا، پنجاب میں الیکشن کے آزادانہ انعقاد کیلئے فول پروف انتظامات کئے جائیں گے، پنجاب ٹیم الیکشن کمیشن کی گائیڈ لائنز پر من وعن عمل کرے گی۔ ان کا کہنا تھا کہ عام انتخابات کا منصفانہ، آزادانہ اور پُرامن انعقاد قومی ذمہ داری ہے، عام انتخابات کے آزادانہ ،منصفانہ کی ذمہ داری احسن طریقے سے نبھائیں گے۔