معروف ٹی وی ہوسٹ تابش ہاشمی کا نامور کرکٹر سے متعلق تہلکہ خیز انکشاف

اسٹینڈ اپ کامیڈین اور ٹی وی میزبان تابش ہاشمی نے انکشاف کیا ہے کہ ایک مشہور کرکٹر کے دیر سے آنے پر انہوں نے پروگرام ’ہنسنا منع ہے‘ کی ریکارڈنگ چھوڑ کر گھر جانے کا فیصلہ کیا۔ میزبان تابش ہاشمی نے ایک تقریب میں وقت کی اہمیت پر گفتگو کرتے ہوئے دلچسپ واقعات سنائے۔ انہوں نے بتایا کہ جب وہ جیو نیوز میں ملازمت کے لیے انٹرویو دے رہے تھے تو جیو کے سربراہ میر شکیل الرحمٰن نے ان سے پوچھا کہ جوائننگ سے قبل انہیں کس بات کا خدشہ ہے؟ اس پر تابش ہاشمی نے جواب دیا کہ یہاں وقت کی پابندی نہیں کی جاتی، جیسے اس روز بھی انہیں 3 بجے بلایا گیا تھا لیکن ملاقات تقریباً پونے 4 بجے شروع ہوئی۔ یہ سن کر میر شکیل نے کہا کہ میڈیا میں وقت کی سختی سے پابندی نہیں ہوتی اور یہاں دیر سویر چلتی رہتی ہے، اس لیے انہیں اپنی یہ عادت بدلنی ہوگی۔ تابش ہاشمی نے کہا کہ وہ وقت کے معاملے میں سخت ہیں اور یہ عادت نہیں بدل سکتے۔ اس پر میر شکیل نے مسکراتے ہوئے کہا کہ پھر دیکھتے ہیں کون بدلتا ہے۔ تابش ہاشمی کے مطابق تین سال گزرنے کے باوجود وہ اب بھی اپنی عادت پر قائم ہیں۔ انہوں نے ایک حالیہ واقعہ بیان کرتے ہوئے کہا کہ انہوں نے اپنے پروگرام میں ایک معروف کرکٹر کو مدعو کیا تھا۔ جنہیں شام ساڑھے پانچ بجے پہنچنا تھا لیکن وہ ڈیڑھ گھنٹے کی تاخیر سے آئے، شوٹنگ کا وقت ختم ہوچکا تھا، اس لیے وہ گھر واپس چلے گئے۔ تابش ہاشمی نے بتایا کہ بعد میں ان سے فون پر معذرت کی گئی مگر انہوں نے جواب دیا کہ وقت کی قدر نہ کرنا ان کی توہین ہے، خواہ سامنے والا کتنا ہی بڑا کرکٹر کیوں نہ ہو۔ انہوں نے کہا کہ جو شخص اپنے وقت کی قدر نہیں کرتا وہ کسی دوسرے کے وقت کی بھی قدر نہیں کرسکتا اور ان کا ماننا ہے کہ وقت کی قدر کرنے والوں کو وقت بھی عزت دیتا ہے۔ تابش ہاشمی کا مزید کہنا تھا کہ اگر کبھی شہر کے حالات یا ٹریفک کی وجہ سے کہیں پہنچنے میں تاخیر ہوجائے تو کم از کم اطلاع دینی چاہیے کیونکہ یہ آداب کا تقاضا ہے اور جو لوگ وقت کی قدر کرتے ہیں وہ زندگی میں کچھ بھی حاصل کرسکتے ہیں۔ انہوں نے یہ بھی وضاحت کی کہ حال ہی میں انہوں نے وسیم اکرم کو بھی پروگرام میں دعوت دی تھی لیکن وہ وقت کے پابند ہیں، جس کرکٹر کے بارے میں انہوں نے واقعہ سنایا وہ کوئی اور تھے جن کا نام انہوں نے نہیں بتایا۔