خلیل الرحمان قمر کی ٹی وی میزبان نادیہ خان پر کڑی تنقید، وجہ کیا بنی؟

معروف سینئر ڈرامہ نگار اور شاعر خلیل الرحمٰن قمر نے اپنے ڈراموں پر ہونے والی تنقید پر وضاحت پیش کی ہے۔ انہوں نے کہا کہ بعض افراد بلاوجہ میرے تمام پراجیکٹس پر تنقید کرتے ہیں، جن میں نادیہ خان، عتیقہ اوڈھو اور مرینہ خان شامل ہیں۔ ایک یوٹیوب چینل پر گفتگو کرتے ہوئے خلیل الرحمٰن قمر نے کہا کہ نادیہ خان کا اداکاری سے کوئی تعلق نہیں اور نہ ہی وہ اردو یا انگریزی جانتی ہیں، اس لیے میں نے کبھی ان کے ساتھ کام کرنے کا ارادہ ہی نہیں کیا۔ تاہم، انہوں نے کہا کہ عتیقہ اوڈھو اور مرینہ خان کے ساتھ کام کرنے پر غور ضرور کیا ہے، مگر ان کی اردو کمزور ہے۔ پاکستان میں ڈرامے خالص اردو میں بنتے ہیں، اس لیے اداکاروں کے لیے اردو جاننا ضروری ہے۔ خلیل الرحمٰن قمر نے مزید کہا کہ انہوں نے ابھی تک دونوں اداکاراؤں کے ساتھ کام نہیں کیا، اور یہ بالکل جائز ہے کہ لوگ تنقید کریں۔ لیکن ان شاءاللّٰہ، جب وہ اردو میں مہارت حاصل کر لیں گی، تو میں خوشی سے ان کے ساتھ کام کرنے کا خواہاں ہوں۔ انہوں نے ان دونوں کو سینئر اور تجربہ کار اداکارائیں قرار دیا۔ خلیل الرحمٰن قمر نے بتایا کہ انہوں نے عتیقہ اوڈھو کے ڈراموں میں ’دشت‘ یا ’نجات‘ دیکھے ہیں، جن میں چائلڈ لیبر کا موضوع تھا، اور مرینہ خان کے ڈراموں میں صرف ’تنہائیاں‘ اور ’دھوپ کنارے‘ دیکھے ہیں۔ اس کے بعد کوئی ڈرامہ نہیں دیکھا میری خواہش ہے کہ ایک دن یہ دونوں اداکارائیں میرے ساتھ کام کرنے پر رضامند ہوں گی۔