محمد نواز کی شاندار ہیٹ ٹرک، افغان بیٹرز کو بے بس کر دیا

شارجہ میں کھیلے گئے تین ملکی ٹی 20 سیریز کے فائنل میں پاکستانی اسپنر محمد نواز نے اپنی تباہ کن بولنگ سے افغان بیٹرز کو تگنی کا ناچ نچادیا اور شاندار ہیٹ ٹرک مکمل کی۔ انہوں نے مسلسل تین گیندوں پر تین افغان بلے بازوں کو آؤٹ کر کے تاریخ رقم کی اور اننگز میں 5 وکٹیں حاصل کیں، جس سے وہ میچ اور سیریز کے ہیرو بن گئے۔ محمد نواز نے 4 اوورز میں صرف 19 رنز دے کر 5 وکٹیں حاصل کیں، جس میں افغان بلے باز درویش رسولی کو 29 کے مجموعی اسکور پر ایل بی ڈبلیو کیا۔ نئے آنے والے بلے باز عظمت اللہ عمرزئی بھی وکٹ کیپر کے ہاتھوں کیچ آؤٹ ہوئے۔ ہیٹ ٹرک کا تیسرا شکار ابراہیم زادران بنے، جنہیں نواز نے اگلے اوور کی پہلی گیند پر سٹمپ آؤٹ کر کے پویلین بھیج دیا۔ ہیٹ ٹرک کے بعد بھی محمد نواز کی دھواں دار بولنگ جاری رہی اور نئے آنے والے بلے باز کریم جنت صرف دو گیندیں کھیلنے کے بعد کسی رن کے بغیر آؤٹ ہو گئے۔ محمد نواز کی شاندار آل راؤنڈ پرفارمنس نے پاکستانی ٹیم کو فائنل جیتنے میں کلیدی کردار ادا کیا اور افغان بیٹرز کو مکمل طور پر بے بس کر دیا۔ محمد نواز کا اگلا شکار افغان کپتان راشد خان بنے، جو 55 کے مجموعی اسکور پر 17 رنز بنا کر کیچ آؤٹ ہوئے۔ قبل ازیں محمد نواز نے بلے بازی کرتے ہوئے 25 رنز جوڑ کر مجموعی ہدف 142 رنز میں اپنا حصہ بھی ڈالا۔ واضح رہے کہ پاکستان نے شارجہ میں کھیلے گئے سہ ملکی سیریز کے فائنل میں افغانستان کو 75 رنز سے شکست دی ہے۔ ہدف کے تعاقب میں افغان ٹیم 66 کے مجموعی اسکور پر 16ویں اوور میں ڈھیر ہوگئی۔ محسن نقوی کی تین ملکی ٹی 20 سیریز جیتنے پر پاکستانی ٹیم کو مبارکباد دوسری جانب چیئرمین پی سی بی محسن نقوی نے تین ملکی ٹی 20 سیریز جیتنے پر پاکستانی ٹیم کو مبارکباد دی ہے۔ محسن نقوی نے محمد نوازکی آل راؤنڈ کارکردگی کی تعریف کرتے ہوئے کہا کہ محمد نواز کی بولنگ نے میچ کا پانسہ پلٹ دیا، پاکستانی کھلاڑیوں نے کم اسکور کے باوجود افغانستان کو ہرایا۔ انہوں نے مزید کہا کہ پاکستانی کھلاڑیوں نے افغان ٹیم کو آؤٹ کلاس کر کے جیت اپنے نام کی، قوم ٹیم سے ایسی ہی اعلیٰ کارکردگی کی توقع رکھتی ہے۔ آج کی جیت سے کھلاڑیوں کا مورال بلند ہوا ہے، امید ہے پاکستانی ٹیم ایشیاکپ میں بھی ایسی ہی کارکردگی دکھائے گی۔