اقوام متحدہ کے سیکرٹری جنرل انتونیو گوتریز ملک میں حالیہ طوفانی بارش اور سیلاب کی بدترین صورتحال کا جائزہ لینے کے لئے کل سے پاکستان کا دو روزہ دور کرینگے۔
اقوام متحدہ کے انڈر سیکرٹری جنرل انسانی امور اور ہنگامی امداد کے رابطہ کار مارٹن گرفتھ اور دیگر عہدیدار ان کے ہمراہ ہونگے۔نیویارک میں اپنی معمول کی بریفنگ میں اقوام متحدہ کے ترجمان سٹیفن ڈیوجیرک نے کہا کہ سیکرٹری جنرل اپنے وفد کے ہمراہ خیبرپختونخوا اور سندھ میں سیلاب سے متاثرہ علاقوں کا دورہ کرینگے۔
انہوں نے کہا کہ اس دوران پاکستان میں اقوام متحدہ کی ٹیم اور ان کے شراکت دار ملک میں سیلاب متاثرین کو امداد کی فراہمی جاری رکھیں گے۔
