بنگلا دیش نے 3 میچز کی سیریز کے پہلے ایک روزہ میچ میں آسٹریلیا کو 86 رنز سے شکست دے کر 21 سال بعد ون ڈے کرکٹ میں ایک تاریخی کامیابی اپنے نام کر لی۔ بارش سے متاثرہ مقابلے کا فیصلہ ڈک ورتھ لوئس اسٹرن (DLS) طریقہ کار کے تحت ہوا، تاہم میزبان ٹیم نے میچ کے بیشتر حصے میں… شیرِ بنگلا نیشنل اسٹیڈیم ڈھاکا میں کھیلے گئے میچ میں بنگلا دیش نے پہلے بیٹنگ کرتے ہوئے 8 وکٹوں کے نقصان پر 284 رنز بنائے۔ مصّدق حسین نے چار سال بعد ٹیم میں واپسی کو یادگار بناتے ہوئے 70 گیندوں پر ناقابلِ شکست 86 رنز کی شاندار اننگز کھیلی، جس میں 7 چوکے اور 3 چھکے شامل تھے۔ کپتان نجم الحسن شانتو نے 67 جبکہ تنزید حسن نے بھی اہم رنز بنا کر ٹیم کو مضبوط بنیاد فراہم کی۔ بنگلا دیشی اننگز کے دوران شانتو اور تنزید حسن نے دوسری وکٹ کی شراکت میں 96 رنز جوڑ کر آسٹریلوی بولرز کو دباؤ میں رکھا۔ بعد ازاں مصّدق حسین اور توحید ہردوئے نے ذمہ دارانہ بیٹنگ کرتے ہوئے ٹیم کا اسکور مستحکم کیا۔ آسٹریلیا کی جانب سے نیتھن ایلس نے 3 وکٹیں حاصل کیں، تاہم فیلڈنگ میں چار کیچز چھوڑنے کا نقصان بھی ٹیم کو اٹھانا پڑا۔ 285 رنز کے ہدف کے تعاقب میں آسٹریلوی بیٹنگ لائن ابتدا ہی سے مشکلات کا شکار رہی۔ اوپنر میٹ شارٹ پہلی ہی گیند پر آؤٹ ہوگئے جبکہ مارنس لبوشین صرف ایک رن بنا سکے۔ کپتان جوش انگلس سمیت دیگر بیٹرز بھی بنگلادیشی بولرز کے سامنے مزاحمت نہ کر سکے۔ تیز رفتار بولر نہید رانا نے اپنی برق رفتار بولنگ سے آسٹریلوی بیٹرز کو پریشان کیے رکھا اور 4 وکٹیں حاصل کیں۔ ان کی کئی گیندوں کی رفتار 150 کلومیٹر فی گھنٹہ سے زائد ریکارڈ کی گئی۔ مصّدق حسین نے آل راؤنڈ کارکردگی کا مظاہرہ کرتے ہوئے دو وکٹیں بھی اپنے نام کیں جبکہ تسکین احمد اور مستفیض الرحمٰن نے بھی اہم کامیابیاں حاصل کیں۔ آسٹریلیا کی جانب سے کیمرون گرین 52 اور ایلکس کیری 47 رنز بنا کر نمایاں رہے، تاہم وہ اپنی ٹیم کو شکست سے نہ بچا سکے۔ بارش کے باعث میچ روکنے کے وقت آسٹریلیا 9 وکٹوں کے نقصان پر 191 رنز بنا سکا اور یوں بنگلا دیش نے 86 رنز سے کامیابی حاصل کر لی۔ یہ ون ڈے کرکٹ میں آسٹریلیا کے خلاف بنگلا دیش کی صرف دوسری فتح ہے۔ اس سے قبل بنگلہ دیش نے 2005 میں کارڈف میں آسٹریلیا کو شکست دے کر کرکٹ دنیا کو حیران کر دیا تھا، جبکہ بنگلا دیش کی آسٹریلیا کے خلاف ون ڈے میچز میں ہوم گراؤنڈ پر یہ پہلی جیت ہے۔
بنگلا دیش نے آسٹریلیا کو 86 رنز سے شکست دیکر تاریخی کامیابی اپنے نام کر لی
