ویسٹ انڈیز کے خلاف دوسرے ٹیسٹ میں پاکستان کے عبداللہ شفیق نے 150 رنز مکمل کرلیے ہیں۔ پورٹ آف اسپین میں کھیلے جارہے سیریز کے دوسرے ٹیسٹ کے تیسرے روز پاکستان نے 2 وکٹ پر 266 رنز پر اپنی پہلی اننگز دوبارہ شروع کی۔ کپتان بابر اعظم اور عبداللہ شفیق نے دن کا آغاز کیا تاہم دونوں بیٹرز گزشت روز کی شاندار شراکت کو زیادہ دیر آگے نا بڑھا سکے اور بابر اعظم 147 گیندوں پر 88 رنز بنا کر آؤٹ ہوئے۔ بابر اعظم کی اننگز میں 10 چوکے اور ایک چھکا شامل تھا تاہم وہ سنچری مکمل کرنے سے صرف 12 رنز پہلے آؤٹ ہوگئے۔ بابر اعظم کے آؤٹ ہونے کے بعد پاکستان کی بیٹنگ لائن مشکلات کا شکار ہوگئی اور ٹیم نے صرف 6 گیندوں کے دوران مزید 2 وکٹیں گنوا دیں۔ بعد ازاں وکٹ کیپر بیٹر محمد رضوان نے عبداللہ شفیق کا ساتھ دیا اور دونوں نے 25 رنز کی شراکت قائم کرتے ہوئے ٹیم کا اسکور 300 رنز سے آگے پہنچایا، تاہم رضوان 18 رنز بنا کر جومیل واریکن کی گیند پر بولڈ ہوگئے۔ رضوان کے آؤٹ ہونے کے بعد عبداللہ شفیق نے ساجد خان کے ساتھ مل کر محتاط انداز میں بیٹنگ کی اور دونوں کھلاڑی اب تک وکٹ پر ہیں اور 59 رنز کی شراکت قائم کی۔ ساجد خان 71 گیندوں پر 30 رنز بناکر آؤٹ ہوگئے جبکہ عبداللہ شفیق 312 گیندوں پر 153 رنز بناچکے ہیں اور اب تک وکٹ پر موجود ہیں۔ پاکستان ٹیم کو اس وقت ویسٹ انڈیز پر 31 رنز کی برتری حاصل ہے۔ یاد رہے ویسٹ انڈیز نے پورٹ آف اسپین ٹاس جیت کر پہلے بیٹنگ کرنے کا فیصلہ کیا تھا اور ہوم ٹیم نے دوسرے دن تک کھیلتے ہوئے پہلی اننگز میں 344 رنز بنائے تھے۔ پاکستان کی جانب سے ساجد خان نے 4، عبید شاہ، محمد علی اور علی عثمان نے 2، 2 وکٹیں حاصل کیں۔ خیال رہے کہ پہلے ٹیسٹ میچ میں ویسٹ انڈیز نے پاکستان کو باآسانی شکست دے کر دو میچز کی سیریز میں 0-1 کی برتری حاصل کرلی تھی۔
دوسرا ٹیسٹ: عبداللہ شفیق نے 150 رنز مکمل کر لیے، پاکستان کے 7 وکٹ کے نقصان پر 375 رنز
