پاکستان نے غزہ میں نسل کشی روکنے کے لیے اقوام متحدہ کی سلامتی کونسل سے فوری کارروائی کا مطالبہ کر دیا

پاکستان نے غزہ میں جاری ہلاکت خیز کارروائیوں اور انسانی بحران کے پیش نظر اقوام متحدہ کی سلامتی کونسل سے فوری اور مؤثر اقدام کرنے کا مطالبہ کیا ہے تاکہ وہاں جاری نسل کشی کو روکا جا سکے اور فلسطینی عوام کی جان و مال کے تحفظ کو یقینی بنایا جا سکے۔ وزارتِ خارجہ نے کہا کہ پاکستان اس مسئلے… اقوام متحدہ میں پاکستانی مستقل مندوب عاصم افتخار احمد نے خطاب میں کہا غزہ میں بڑے پیمانے پر قتل، بے دخلی، قحط اور تباہی جاری ہے، اسرائیل فلسطینیوں کی سرعام نسل کشی کررہا ہے۔ عاصم افتخار نے کہا کہ اسرائیلی اقدامات بین الاقوامی قانون کی صریح خلاف ورزی ہیں، دنیا براہِ راست قتلِ عام دیکھ رہی ہے، سلامتی کونسل کو اپنے چارٹر کے مطابق اقدام کرنا ہوگا۔ انہوں نے کہا کہ دنیا تاخیر کومعاف نہیں کریگی، تاریخ خاموشی کو یاد رکھے گی، دنیا بے عملی کو فراموش نہیں کرے گی، سلامتی کونسل کو اپنے چارٹر کے مطابق اقدام کرنا ہوگا۔ پاکستان کے مستقل مندوب نے کہا کہ یہ کیسےکبھی جائز یا قابلِ دفاع ہو سکتا ہے؟، یہ محض ضمنی نقصان نہیں، یہ اجتماعی قتل و غارت ہے۔ غزہ میں یہ ناقابلِ برداشت المیہ 691 دن سے جاری ہے، اسرائیلی افواج نےجان بوجھ کر شہری زندگی کو تباہ کیا۔