رسولِ اقدس ﷺ کی ولادت با سعادت کا دن، فضائیں درود و سلام سے معطر

رحمت اللعالمین، خاتم النبیین، ہادی عالم حضرت محمد مصطفیٰ ﷺ کی ولادت باسعادت کا جشن ملک بھر میں مذہبی عقیدت و احترام کے ساتھ منایا جارہا ہے۔ عید میلاد النبی ﷺ کے موقع پر ملک کے ہر شہر، ہر گلی اور ہر کوچے میں چراغاں ہے، جبکہ مساجد، بازاروں، عمارتوں اور چوراہوں پر سبز پرچموں کی بہار نظر آ رہی… ملک بھر میں میلاد النبی ﷺ کے جلوس نکالے جارہے ہیں اور درود و سلام کی محفلوں میں حضور اکرم ﷺ سے والہانہ محبت کا اظہار کیا جا رہا ہے۔ دن کا آغاز وفاقی دارالحکومت میں 31 اور صوبائی دارالحکومتوں میں 21، 21 توپوں کی سلامی سے ہوا۔ نماز فجر کے بعد مساجد اور گھروں میں ملک کی ترقی، سلامتی، خوشحالی اور امت مسلمہ کے اتحاد کے لیے خصوصی دعائیں کی گئیں۔ گورنر ہاؤس کراچی میں محفلِ میلاد کا اہتمام کراچی میں گورنرہاؤس میں عید میلادالنبیﷺ کی محفل سجائی گئی، اس موقع پر گورنرسندھ کامران ٹیسوری نےکہاکہ حضور ﷺ کی ولادت باسعادت ساری انسانیت کے لیے باعثِ رحمت ہے۔ آپ ﷺ کی سیرت طیبہ میں زندگی کے ہر شعبے کے لیے کامل رہنمائی موجود ہے۔ گورنر سندھ نے کہا کہ ہم بدنصیب ہیں کہ رسولﷺ کی سنت وسیرت پرعمل پیرا نہیں ہورہے، انہوں نے بتایا کہ انہیں 12 ربیع الاول کے دن ہی گورنر کے منصب پر آنا نصیب ہوا۔ ادھر لاہور بھی آج کے دن رنگ و نور سے جگمگا اٹھا، بازاروں میں برقی قمقموں کی بہار ہے اور مساجد کے مینار چراغاں سے منور کردیے گئے۔ اہل لاہور شہر کی گلیاں، محلے اور بازار خوشی کے رنگوں سے آراستہ کر کے عید میلاد النبی صلی اللہ علیہ وسلم کا والہانہ استقبال کر رہے ہیں۔ اسلام آباد اور راولپنڈی میں بھی آقا ئے دو جہاں سے محبت کا اظہار کیا جارہا ہے۔ کوئٹہ میں جشن میلادالنبی ﷺ مذہبی عقیدت و احترام سے منایا جارہاہے جہاں شہر کی مساجد اور عمارتوں کو برقی قمقموں سے سجا دیا گیا۔ کوئٹہ میں دن کی مناسبت سے سیکورٹی کےلیے 4 ہزار سے زائد پولیس اور ایف سی اہلکار تعینات کرنےکا فیصلہ کیا گیا ہے جبکہ کوئٹہ میں آج موبائل فون ڈیٹا سروس بند ہے۔