فلسطین کے حق میں پاکستان کی پرعزم پالیسی، ہر پلیٹ فارم پر حمایت کا اعلان

پاکستان نے فلسطین کی غیر متزلزل حمایت کا اعادہ کرتے ہوئے کہا ہے کہ ہر سفارتی فورم پر فلسطینی عوام کے حقوق کے لیے پوری قوت سے آواز بلند کی جائے گی۔ وزیراعظم شہباز شریف سے فلسطینی صدر کے مشیر برائے مذہبی امور اور شرعی عدالت کے چیف جسٹس محمود صدیقی الھباش نے وفد کے ہمراہ ملاقات کی۔ اس موقع پر وزیراعظم نے کہا کہ فلسطینی عوام بہادری کے ساتھ اسرائیلی جارحیت کا مقابلہ کر رہے ہیں اور قابض افواج کی کارروائیوں کے باعث انسانی ساختہ قحط کا شکار ہیں۔ وزیراعظم نے واضح کیا کہ پاکستان غزہ کے عوام کے لیے انسانی امداد فراہم کرنے کا سلسلہ جاری رکھے گا۔ ملاقات کے دوران پاکستان نے ایک بار پھر فلسطینی عوام کے ساتھ مکمل یکجہتی اور ہر فورم پر ان کے حق میں مؤثر آواز بلند کرنے کے عزم کو دہرایا۔ فلسطینی صدر کے مشیر نے پاکستان میں سیلاب سے ہونے والے جانی و مالی نقصانات پر افسوس کا اظہار کیا اور صدر محمود عباس کا خط وزیراعظم شہباز شریف کے حوالے کیا۔ جس پر وزیراعظم نے فلسطین کے صدر محمود عباس کیلئے تہنیتی پیغام بھی دیا۔