آپریشن سومنات آج بھی دفاعی جذبے کی یاد دلاتا ہے، وزیراعظم شہباز شریف

وزیراعظم شہباز شریف نے یومِ بحریہ کے موقع پر پاک بحریہ کے جوانوں، افسران اور اہلکاروں کو خراجِ تحسین پیش کرتے ہوئے کہا کہ بحریہ کی پیشہ ورانہ خدمات نے ہمیشہ قوم کا سر فخر سے بلند کیا ہے۔ انہوں نے کہا کہ یہ دن ملک کی آبی سرحدوں اور مفادات کے تحفظ کے عزم کو دہرانے کا دن ہے۔ وزیراعظم نے پاک بحریہ کی تاریخ کو بہادری کی داستانوں سے بھرپور قرار دیتے ہوئے 1965 کی جنگ میں آپریشن سومنات کو یادگار معرکہ قرار دیا، جس میں دوارکا پر حملہ کر کے بھارتی مواصلاتی نظام تباہ کیا گیا۔ شہباز شریف نے کہا کہ اس تاریخی فتح نے آج بھی جوانوں کے جذبۂ دفاعِ وطن کو تازہ کر رکھا ہے۔ ان کا کہنا تھا کہ پاکستان کی آبی سرحدوں کی حفاظت بحریہ کی مستعد نگرانی میں ہے جبکہ بحیرۂ عرب میں طاقت کا توازن قائم رکھنے میں بھی پاک بحریہ کا اہم کردار ہے۔ وزیراعظم نے مزید کہا کہ پاک بحریہ نے معرکۂ حق میں اپنی تیاری اور عزم کا عملی ثبوت دیا، اور آج بلیو اکانومی اور بندرگاہوں کی ترقی میں بھی کلیدی کردار ادا کر رہی ہے۔ وزیراعظم نے کہا کہ پاک بحریہ ملک کی محافظ اور ہمارے تابناک مستقبل کی معمار ہے۔ آج یوم بحریہ پر ہم پاک بحریہ کے ماضی اور موجودہ ہیروز کو سلام پیش کرتے ہیں۔ انہوں نے دعا کی کہ اللہ پاک بحریہ، مسلح افواج اور پاکستان کو ترقی، خوشحالی اور کامیابی سے ہمکنار کرے۔