قطر کے اعتماد کو ٹھیس پہنچائی گئی، معاملہ فلسطین سے آگے بڑھ چکا ہے، خواجہ آصف

وزیرِ دفاع خواجہ آصف کا کہنا ہے کہ قطر کو محسوس ہو رہا ہے کہ اس کے ساتھ دھوکا ہوا ہے اور وہ اس نتیجے پر پہنچ چکا ہے کہ موجودہ صورتحال اب صرف فلسطین تک محدود نہیں رہے گی بلکہ آگے بڑھ کر خطے کے دیگر معاملات پر بھی اثر ڈالے گی۔ وزیراعظم کے ہمراہ امیر قطر سے ملاقات میں موجود وزیر دفاع خواجہ آصف نے جیونیوز کے پروگرام آج شاہ زیب خانزادہ کے ساتھ میں گفتگو کرتے ہوئےکہا ہے۔ کہ قطر پر حملے کے معاملے پر صدر ٹرمپ کی ناراضی کافی نہیں ہے، عرب ممالک کو اب یہ احساس ہو رہا ہے کہ امریکا کی پہلی اور آخری ترجیح اسرائیل ہے۔ خواجہ آصف نے کہا کہ قطر سمیت پوری عرب دنیا یہ سمجھتی ہے کہ اُن کے ساتھ دھوکا ہوا ہے اور وہاں یہ احساس پایا جاتا ہے۔ کہ معاملہ اب صرف فلسطین تک محدود نہیں رہے گا بلکہ آگے بڑھے گا، یہ مسئلہ مسلم امہ کو حل کرنا پڑے گا۔ ان کا کہنا تھا کہ اگر خطے میں امن قائم ہو جائے تو اسرائیلی وزیراعظم نیتن یاہو ایک دن کے لیے بھی اقتدار میں نہیں رہ سکتے۔ جب تک جنگ جاری رہے گی نیتن یاہو کا اقتدار چلتا رہے گا۔