امریکی وفد کی این ڈی ایم اے نیشنل ایمرجنسی سینٹر کا دورہ، موسمیاتی تبدیلیوں پر تعاون کا عزم

امریکی ناظم الامور نیٹلی بیکر کی قیادت میں امریکی سینٹرل کمانڈ اور ڈیزاسٹر ریسپانس گروپ نے نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر (NEOC) کا دورہ کیا۔ دورے کے دوسرے روز امریکی محکمہ خارجہ کی ڈیزاسٹر ایکسپرٹ برائے ایشیا، ایوانا ووکو اور ان کی ٹیم نے مشاورتی اجلاس میں شرکت کی۔ دو روزہ اجلاس میں قدرتی آفات کی روک تھام اور موسمیاتی تبدیلیوں کے منفی اثرات سے نمٹنے کے حوالے سے گہرا تبادلہ خیال ہوا۔ این ڈی ایم اے کے چیئرمین لیفٹیننٹ جنرل انعام حیدر ملک نے وفد کو NEOC کی صلاحیتوں، پیشگی انتباہی نظام اور بین الاقوامی ریلیف و ریسپانس کے معاونتی طریقہ کار پر تفصیلی بریفنگ دی۔ اجلاس میں این ڈی ایم اے کی جانب سے عالمی تعاون، پیشگی احتیاطی اقدامات اور بین الاقوامی فرضی مشقوں (CISE) کے ذریعے غیر ملکی و علاقائی ممالک کے ساتھ مشترکہ تیاری کے لائحہ عمل پر بھی روشنی ڈالی گئی۔ اس کے علاوہ جدید ٹیکنالوجی کے استعمال سے سرچ اینڈ ریسکیو آپریشنز اور سیلاب کی وارننگ و تیاری کے عمل پر بھی تفصیلات فراہم کی گئیں۔ نیٹلی بیکر نے این ڈی ایم اے کے جدید ڈیزاسٹر مینجمنٹ ماڈل اور CISE جیسی مشترکہ سرگرمیوں کو خطے کے لیے مثالی قرار دیتے ہوئے اس تعاون کی اہمیت کو اجاگر کیا۔ امریکہ نے یقین دلایا کہ وہ 2025 کے متوقع سیلاب کے دوران پاکستان کی امدادی سرگرمیوں، بشمول امدادی سامان کی فراہمی، تکنیکی ماہرین کی تعیناتی اور فلاحی اداروں کے ذریعے مکمل معاونت فراہم کرے گا۔ لیفٹیننٹ جنرل پیٹرک فرینک نے این ڈی ایم اے کے فعال اقدامات اور NEOC کے کلیدی کردار کو سراہتے ہوئے کہا کہ یہ اقدامات خطے میں قدرتی آفات سے نمٹنے کی صلاحیت کو مزید مضبوط کریں گے۔ امریکی وفد نے اس عزم کا اعادہ کیا کہ وہ آفات سے بچاؤ کے شعبے میں پاکستان کے ساتھ تعاون کو مزید بڑھائیں گے اور باہمی فرضی مشقوں کے ذریعے موسمیاتی تبدیلیوں کے بڑھتے ہوئے خطرات کے پیش نظر خطے کو محفوظ بنانے میں مدد فراہم کریں گے۔