واشنگٹن میں فوجی تعیناتی کے خلاف ہزاروں افراد سڑکوں پر آگئے، ٹرمپ سے فیصلہ واپس لینے کا مطالبہ

امریکی دارالحکومت واشنگٹن میں صدر ڈونلڈ ٹرمپ کے فوج تعیناتی کے فیصلے کے خلاف ہزاروں افراد نے احتجاجی مارچ کیا۔ ’وی آر آل ڈی سی‘ کے نام سے نکالے گئے اس مارچ میں تارکینِ وطن اور فلسطین کے حامیوں نے بھی بھرپور شرکت کی۔ مظاہرین نے پلے کارڈز اٹھا رکھے تھے جن پر “فری ڈی سی” سمیت مختلف نعرے درج تھے۔ شرکا نے ٹرمپ کے اقدام کو مسترد کرتے ہوئے حکومت سے فوج کو سڑکوں سے ہٹانے اور فیصلہ واپس لینے کا مطالبہ کیا۔ مظاہرین کا کہنا تھا کہ واشنگٹن پر قبضے جیسے اقدامات آمریت کی نشانی ہیں اور خدشہ ہے کہ یہی حکمتِ عملی دیگر ریاستوں میں بھی اپنائی جا سکتی ہے۔ رپورٹس کے مطابق چھ ریپبلکن اکثریتی ریاستوں سے بھیجے گئے اہلکاروں سمیت دو ہزار سے زائد فوجی شہر کی سڑکوں پر تعینات ہیں۔ ان کی موجودگی کی مدت واضح نہیں تاہم امریکی فوج نے ڈی سی نیشنل گارڈ کی تعیناتی 30 نومبر تک بڑھا دی ہے۔ یاد رہے کہ امریکی صدر نے گزشتہ ماہ شہر میں جرائم کی شرح کا حوالہ دے کر فوج کی تعیناتی کا حکم دیا تھا۔ لیکن محکمہ انصاف کے اعداد و شمار کے مطابق 2024 میں واشنگٹن میں پرتشدد جرائم کی شرح گزشتہ 30 برسوں کی کم ترین سطح پر تھی۔