ارشد ندیم عالمی ایتھلیٹکس چیمپئن شپ کے لیے فٹ قرار، گولڈ میڈل کی دوڑ میں شامل

پاکستان کے نامور اولمپک جیولن تھرور ایتھلیٹ ارشد ندیم کو ورلڈ ایتھلیٹکس چیمپئن شپ کے لیے مکمل طور پر فٹ قرار دے دیا گیا ہے۔ کوچ سلمان بٹ اور فزیو ڈاکٹر اسد عباس شاہ کے مطابق ارشد کی صحت اور فارم بہترین ہے اور وہ ایک بار پھر گولڈ میڈل جیتنے کے مضبوط امیدوار ہیں۔ ارشد اس وقت پنجاب اسٹیڈیم لاہور میں صبح و شام سخت تربیتی سیشنز میں حصہ لے رہے ہیں، جن میں فزیکل کنڈیشننگ، رننگ اور جیولن تھرو کی خصوصی مشقیں شامل ہیں۔ کوچنگ اسٹاف نے کہا کہ ارشد ندیم مثالی فارم میں ہیں اور عالمی مقابلوں میں پاکستان کا پرچم ایک بار پھر بلند کرنے کے لیے پرعزم ہیں۔ ارشد ندیم 9 ستمبر کو جاپان کے دارالحکومت ٹوکیو روانہ ہوں گے، جہاں وہ 17 اور 18 ستمبر کو شیڈول جیولن تھرو مقابلوں میں پاکستان کی نمائندگی کریں گے۔ کوچ سلمان بٹ پرامید ہیں کہ ارشد ندیم ایک بار پھر تاریخ رقم کریں گے اور سونے کا تمغہ جیت کر وطن واپس آئیں گے۔ پاکستانی عوام، کھیلوں کے شائقین اور اسپورٹس اتھارٹیز کی نظریں ایک بار پھر ارشد ندیم کے شاندار کم بیک پر جمی ہوئی ہیں، جو عالمی ایتھلیٹکس چیمپئن شپ میں پاکستانی پرچم سر بلند کرنے کے لیے تیار ہیں۔