ٹرمپ کی حماس کو بڑی دھمکی، سنگین نتائج کا انتباہ

امریکی صدر ڈونلڈ ٹرمپ نے فلسطینی تنظیم حماس کو آخری وارننگ دیتے ہوئے کہا ہے کہ اگر وہ اسرائیل کے ساتھ طے شدہ شرائط قبول نہ کریں تو سنگین نتائج بھگتنے ہوں گے۔ ٹرمپ نے اپنے سوشل میڈیا پیغام میں کہا کہ ہر شخص یرغمالیوں کی رہائی اور جنگ کے خاتمے کا خواہاں ہے۔ انہوں نے واضح کیا کہ اسرائیل نے شرائط قبول کر لی ہیں، اب حماس کی باری ہے۔ امریکی صدر نے دھمکی دی کہ حماس اگر اقدامات نہ کرے تو واشنگٹن سخت اقدامات سے گریز نہیں کرے گا۔ انہوں نے یہ بھی کہا کہ یہ ان کی آخری وارننگ ہے اور اس کے بعد کوئی نرم رویہ اختیار نہیں کیا جائے گا۔ واضح رہے کہ حماس نے غزہ میں جنگ بندی کے لیے مشروط یرغمالیوں کی رہائی کی پیشکش کی تھی، لیکن اسرائیل نے اسے مسترد کر دیا تھا۔ ٹرمپ کی اس دھمکی کے بعد بین الاقوامی سطح پر یہ سوال اٹھ رہا ہے کہ اگر حماس نے امریکی شرائط کو مسترد کیا تو کیا کارروائی کی جائے گی؟ تجزیہ کاروں کا کہنا ہے کہ اس کا اثر پورے خطے میں پڑ سکتا ہے، جہاں پہلے ہی کشیدگی بڑھ چکی ہے۔