وزیر اعظم کا امریکا کے ساتھ تعلقات مضبوط اور چین کے ساتھ اسٹریٹجک روابط بہتر کرنے پر زور

وزیراعظم شہباز شریف نے کہا کہ پاکستان کو امریکا کے ساتھ اچھے تعلقات قائم کرنے اور چین کے ساتھ اسٹریٹجک روابط میں بہتری لانے کی ضرورت ہے۔ وفاقی کابینہ کے اجلاس سے خطاب کرتے ہوئے انہوں نے کہا کہ میجر عدنان اسلم نے خوارج سے لڑتے ہوئے اپنی جان قربان کی۔ میجر عدنان اسلم کے والد نے کہا کہ وہ… وزیراعظم نے سکیورٹی فورسز کی قربانیوں کو خراج تحسین پیش کرتے ہوئے کہا کہ جو قربانی دیتا ہے، اس کی کیفیت کو کوئی نہیں جان سکتا۔ افواج پاکستان کی قربانیوں کی بدولت ہم آزاد فضا میں سانس لے رہے ہیں، اور ہمیں اپنے شہدا کا شکر گزار ہونا چاہیے۔ انہوں نے کہا کہ کچھ لوگ آج ملک کے خلاف پروپیگنڈہ کر رہے ہیں، سوشل میڈیا اور بیرون ملک بیٹھے افراد افواج پاکستان اور ان کی قیادت کو بدنام کرنے کی کوشش کر رہے ہیں۔ سوشل میڈیا پر زہریلے پروپیگنڈے کی مذمت کی جانی چاہیے۔ وزیراعظم نے کہا کہ ہمارا اولین فرض ہے کہ فتنے کی مکمل بیخ کنی کی جائے، نفرت پھیلانے والے اقدامات ناقابل قبول ہیں، اور دہشتگردی کے فتنے کو مکمل طور پر ختم کرنا ہوگا۔ شہباز شریف نے چین کے حالیہ دورے اور بزنس ایونٹ کی کامیابی کا حوالہ دیتے ہوئے کہا کہ اگر فالو اپ نہ ہوا تو یہ صفر ہوگا، اور قومی ترقیاتی منصوبوں میں سست روی برداشت نہیں کی جائے گی۔ انہوں نے مزید کہا کہ امریکی کمپنیوں کے ساتھ معاہدے (ایم او یو) کیے گئے ہیں، اور بلوچستان، چترال اور گلگت بلتستان میں معدنی ذخائر موجود ہیں۔ وزیراعظم نے بتایا کہ پنجاب میں سیلاب نے شدید تباہی مچائی ہے، سندھ میں بھی پانی داخل ہو رہا ہے، اور سیلاب سے بڑے پیمانے پر نقصان ہوا ہے۔ موسمیاتی تبدیلی سے راتوں رات نہیں نمٹ سکتے، پنجاب میں ہزاروں ایکڑ پر فصلیں زیر آب ہیں، سیلاب سے ہونے والے نقصان کا تخمینہ لگانے کی ہدایت کی ہے، اللہ سے دعا ہے کہ سندھ میں سیلاب سے کم نقصانات ہوں۔ شہباز شریف نے کہا کہ قطر میں اسرائیلی بربریت کی جتنی مذمت کی جائے کم ہے، فلسطین میں بے گناہ خون بہایا جا رہا ہے۔ دنیا کی تاریخ میں اس سے زیادہ بربریت کی نذیر نہیں ملتی، قطر پر حملے پر کل فی الفور بیان جاری کیا۔ قطر کے ساتھ مکمل یکجہتی کا اظہار کیا ہے، قطر کے امیر کویقین دہانی کرائی کہ مشکل وقت میں آپ کے ساتھ ہیں۔