پاکستان اور ہانگ کانگ کا قانونی تعاون کا معاہدہ طے کر لیا گیا

پاکستان اور ہانگ کانگ کے درمیان قانونی تعاون کو فروغ دینے کا معاہدہ طے پا گیا۔ یہ معاہدہ پاکستان کی وزارتِ قانون و انصاف اور ہانگ کانگ کے محکمہ انصاف کے درمیان ہانگ کانگ میں منعقدہ دسویں بیلٹ اینڈ روڈ سمٹ کے دوران مفاہمتی یادداشت پر دستخط کے ذریعے طے پایا۔ حکومتِ پاکستان کی جانب سے وفاقی سیکریٹری وزارتِ قانون و انصاف راجہ نعیم اکبر اور ہانگ کانگ کی جانب سے سیکریٹری برائے انصاف پال ٹی کیلام نے معاہدے پر دستخط کیے۔ معاہدے کے تحت دونوں فریقین قانونی امور میں تعاون کو فروغ دیں گے اور قانونی شعبے میں افراد کی تربیت و صلاحیت سازی کے اقدامات کریں گے۔ ہانگ کانگ پاکستان کو کاروباری تنازعات کے حل کے لیے ثالثی اور متبادل حل کے نظام میں تربیت اور تعاون فراہم کرے گا، جبکہ ڈیجیٹل گورننس اور ورچوئل اثاثوں کی ریگولیشن میں بھی دونوں ممالک تعاون کریں گے۔ معاہدے پر دستخط کی تقریب میں دونوں ممالک کے نمائندے موجود تھے اور معاہدے کی اہمیت پر زور دیا گیا کہ یہ قانونی تعاون اور صلاحیت سازی کے نئے دور کا آغاز کرے گا۔ بیلٹ اینڈ روڈ سمٹ سے خطاب کرتے ہوئے راجہ نعیم اکبر نے کہا کہ یہ معاہدہ پاکستان کے قانونی شعبے میں جدید اصلاحات متعارف کروانے، ادارہ جاتی اصلاحات اور علم کے تبادلے میں معاون ہو گا۔ انہوں نے کہا کہ بیلٹ اینڈ روڈ انیشی ایٹو کے تحت دونوں ممالک کے مابین قانونی اور ریگولیٹری تعاون کو مزید مستحکم کرے گا۔ پاکستان اور ہانگ کانگ کے قانون و انصاف کے مابین یہ معاہدہ قانونی اصلاحات کے شعبے میں تعاون کے ایک نئے دور کا آغاز ہے۔