پی ٹی آئی نے گلگت بلتستان کے وزیراعلیٰ سمیت 12 اراکین اسمبلی کی بنیادی رکنیت ختم کر دی

پاکستان تحریک انصاف (پی ٹی آئی) نے وزیراعلیٰ گلگت بلتستان حاجی گلبر خان اور دیگر 12 اراکین اسمبلی کی بنیادی رکنیت منسوخ کر دی۔ اس فیصلے کا باضابطہ نوٹیفکیشن ایڈیشنل سیکرٹری جنرل پی ٹی آئی کی جانب سے جاری کیا گیا، جسے بعدازاں پارٹی کے سوشل میڈیا پیجز پر بھی شیئر کیا گیا۔ نوٹیفکیشن کے مطابق منحرف اراکین نے پارٹی پالیسی کی خلاف ورزی کی، فارورڈ بلاک بنانے کی کوشش کی اور مختلف مواقع پر پارٹی کے خلاف ووٹ دیا، جس پر ان کے خلاف سخت کارروائی عمل میں لائی گئی۔ رکنیت ختم کرنے والوں میں وزیراعلیٰ جی بی حاجی گلبر خان کے علاوہ شمس الحق لون، راجہ اعظم، عبدالحمید، امجد زیدی، حاجی شاہ بیگ، ثریا زمان، راجہ ناصر مقپون، مشتاق احمد، دلشاد بانو اور فضل رحیم شامل ہیں۔ دوسری جانب سابق گورنرگلگت بلتستان راجہ جلال حسین مقپون کوشوکاز نوٹس جاری کردیا گیا ہے۔ مزید برآں گلگت بلتستان کےاراکین کو پارٹی کا نام، جھنڈا اور عہدہ استعمال کرنے کی بھی ممانعت کی گئی ہے۔