پنجاب حکومت اور شوگر ملز مالکان کے درمیان چینی کی قیمت سے متعلق ہونے والے پر 3 روز سے جاری مذاکرات کامیاب ہوگئے۔ نگران وزیر اعلیٰ پنجاب محسن نقوی سے شوگر ملز مالکان کے وفد نے ملاقات کی، اس موقع پر کرشنگ سیزن 28 اکتوبر سے شروع کرنے پر اتفاق کیا گیا۔ اس حوالے سے فریقین میں طے پایا کہ شوگر ملز مالکان پنجاب حکومت کو 140روپے فی کلو چینی فروخت کریں گے اور پنجاب حکومت ماڈل بازاروں اور اتوار بازاروں میں خصوصی اسٹالز پر یہ چینی فروخت کرے گی۔ نگران وزیراعلیٰ پنجاب محسن نقوی نے کہا کہ حکومت کو عوام کی مشکلات کا پورا احساس ہے، چینی کی قیمتوں میں کمی کا فائدہ براہ راست صوبے کے عوام کو ہوگا۔ شوگر ملزمالکان کے وفد نے بریفنگ دیتے ہوئے بتایا کہ پنجاب میں چینی کا وافر اسٹاک موجود ہے، پنجاب میں ضرورت سے زیادہ چینی موجود ہے۔ ملاقات کیلئے آنے والے شوگر ملز مالکان کے وفد میں ہارون اختر، ذکا اشرف، فواد مختاراور دیگر شامل تھے جبکہ حکومت پنجاب کی جانب سے صوبائی وزیر صنعت ایس ایم تنویر، چیف سیکریٹری زاہد اختر زمان اور دیگر بھی موجود تھے۔
