کراچی(طلعت شاہ) ملیر کے ایک نجی کلینک میں مبینہ غلط انجکشن سے 15سال کی لڑکی جاں بحق ہوگئی۔
تفصیلات کے مطابق کراچی کے علاقہ ملیرچمن کالونی میں مبینہ غلط انجکشن سے پندرہ سالہ لڑکی چل بسی، اہل خانہ نے بتایا کہ 15 سالہ لڑکی کی طبیعت افطار کے بعد خراب ہوئی تھی، قریبی اسپتال لےکر گئے جہاں انہوں نے ڈرپ لگائی۔
اہلخانہ کے مطابق اسپتال سے ڈسچارج ہونے پر لڑکی کو گھر لے آئے، کمرے میں لٹایا، جس کے بعد ہم کاموں میں مصروف ہوگئے، کمرے میں دیکھا تو لڑکی مردہ حالت میں تھی۔
اہل خانہ نے کہا کہ لڑکی کی موت کلینک کی غفلت کا نتیجہ ہے ، لڑکی کا پوسٹ مارٹم کروا کر تحقیقات کی جائے۔
پولیس حکام نے بتایا کہ لڑکی کے گھر والے اسپتال انتظامیہ کی غفلت بتا رہے ہیں، لڑکی بیمار تھی والدین علاقے کے نجی کلینک لے کر گئے تھے، نجی کلینک میں دیئے گئے انجکشن سے لڑکی کی طبیعت مزید بگڑی اور کلینک میں غلط انجکشن لگنے کی وجہ سے لڑکی دم توڑ گئی۔
واضح رہے کہ پاکستان میں ڈاکٹروں کی غفلت سبب بے شمار لوگ موت کی نیند سو چکے ہیں۔ دوسری جانب حکومت پر براجمان عہدیداران ایسے معاملات پر آنکھیں بند کر لیتے ہیں جس سے عوام میں شدید مایوسی دیکھنے میں آئی ہے۔
حکام کا کہنا تھا کہ لاش کا پوسٹ مارٹم کرایا جائے گا تاکہ اصل حقیقت سامنے آسکے گی، پوسٹ مارٹم رپورٹ آنے کے بعد تفتیش کو آگے بڑھایا جائے گا اور قانونی کارروائی عمل میں لائی جائے گی۔
